tirā hai kaam kamāñ meñ use lagāne tak
ye tiir ḳhud hī chalā jā.egā nishāne tak
maiñ shīsha kyuuñ na banā aadmī huā kyūñkar
mujhe to umr lagī TuuT phuuT jaane tak
ga.e huoñ ne palaT kar sadā na dī mujh ko
maiñ kitnī baar gayā ġhaar ke dahāne tak
tujhe to apne paroñ par hī e'tibār nahīñ
tū kaise aa.egā uḌ kar mire zamāne tak
kiyā thā faisla buniyād-e-āshiyāñ kā 'nasīm'
havā.eñ tinke uḌā lā.īñ āshiyāne tak