terī āñkhoñ kī chamak bas aur ik pal hai abhī

dekh le is chāñd ko kuchh duur bādal hai abhī

aañkh to ḳhud ko na.e chehroñ meñ kho kar rah ga.ī

dil magar us shaḳhs ke jaane se bojhal hai abhī

ab talak chehre pe haiñ tūfāñ guzarne ke nishāñ

tah meñ patthar jā chukā paanī pe halchal hai abhī

tū to un kā bhī gila kartā hai jo tere na the

tū ne dekhā hī nahīñ kuchh bhī tū pāgal hai abhī

kar gayā sūraj mujhe tanhā kahāñ lā kar 'nasīm'

kyā karūñ maiñ rāste meñ shab kā jañgal hai abhī