ye zarre jin ko ham ḳhāk-e-rah-e-manzil samajhte haiñ

zabān-e-hāl rakhte haiñ zabān-e-dil samajhte haiñ

jise sab log husn o ishq kī manzil samajhte haiñ

buland us se bhī ham apnā maqām-e-dil samajhte haiñ

haqīqat meñ jo rāz-e-dūri-e-manzil samajhte haiñ

unhīñ ko ham sulūk-e-ishq meñ kāmil samajhte haiñ

hameñ kyuuñ vo jafā-e-ḳhās ke qābil samajhte haiñ

ye rāz-e-dil hai is ko mahramān-e-dil samajhte haiñ

isī ik jurm par aġhyār meñ barpā qayāmat hai

ki ham bedār haiñ aur apnā mustaqbil samajhte haiñ

nigāhoñ meñ kuchh aise bas ga.e haiñ husn ke jalve

koī mahfil ho lekin ham tirī mahfil samajhte haiñ

koī maane na maane is ko lekin ye haqīqat hai

ham apnī zindagī meñ ġhaib ko shāmil samajhte haiñ

ye narm o nā-tavāñ maujeñ ḳhudī kā raaz kyā jāneñ

qadam lete haiñ tūfāñ azmat-e-sāhil samajhte haiñ

hukūmat ke mazālim jab se in āñkhoñ ne dekhe haiñ

'jigar' ham bamba.ī ko kūcha-e-qātil samajhte haiñ