ḳhafī rahā yā jalī ālam-e-shuhūd meñ thā
maiñ amr-e-kun se bhī pahle kisī vajūd meñ thā
kisī sadā ne barañgeḳhta kiyā mujh ko
vagarna maiñ bhī isī halqa-e-ḳhumūd meñ thā
mujhe shu.ūr diyā be.asat-e-payambar ne
phir is ke baad maiñ allāh ke junūd meñ thā
mujhe husain ne zarre se māhtāb kiyā
maiñ be-nishān tamāshā-e-hast-o-būd meñ thā
na jidd-o-jahd-e-musalsal ne soz-o-sāz-e-hayāt
misāl-e-shajr zamīñ-bos maiñ jumūd meñ thā
añdherī raat meñ nudrat milī sitāre ko
tamām roz vo Duubā huā kabūd meñ thā
talāsh-e-manzil-e-hastī meñ ḳhāk-bāzī kī
mirā maqām magar qil.a-e-umūd meñ thā
mujhe qayām ke qābil kiyā irāde ne
maiñ ek umr talak hālat-e-qu.ūd meñ thā
vo karr-o-far-e-taḳhayyul ke nāshirān to the
magar har ek numā.ish meñ yā numūd meñ thā
maiñ madd-o-jazr-e-taḳhayyul ko us ke naam karūñ
ki jis kā zikr hamesha mire darūd meñ thā
vo taḳht-e-ḳhāk pe baiThā vahī qalandar hai
ki jis ke sāmne jibrīl bhī sujūd meñ thā
matā-e-qāfila-e-ishq jab luTī 'naqqāsh'
vo mere mulk-e-sitam-kesh kī hudūd meñ thā