apnī jāñ-bāzī kā jis dam imtihāñ ho jā.egā

ḳhanjar-e-saffāk par jauhar ayaañ ho jā.egā

āh-e-sozāñ kā agar ūñchā dhuāñ ho jā.egā

āsmāñ ik aur zer-e-āsmāñ ho jā.egā

kuchh samajh kar us mah-e-ḳhūbī se kī thī dostī

ye na samjhe the ki dushman āsmāñ ho jā.egā

le ḳhabar bīmār-e-ġham kī varna ai rashk-e-masīh

terī furqat meñ firāq-e-jism-o-jāñ ho jā.egā

ḳhaak kar degā mujhe āḳhir siyah-chashmoñ kā ishq

jism-e-ḳhākī gard-e-pā-e-āhu.vāñ ho jā.egā

jab adā se vo karegā qatl mujh ko ai 'asar'

kushta-e-shamshīr-e-hairat ik jahāñ ho jā.egā