monis-e-dil koī naġhma koī tahrīr nahīñ

harf meñ ras nahīñ āvāz meñ tāsīr nahīñ

aa hī jaatā hai ujaḌtī huī duniyā kā ḳhayāl

bāvar aayā ki tirā dard hama-gīr nahīñ

hijr ik vaqfa-e-bedār hai do nīndoñ meñ

vasl ik ḳhvāb hai jis kī koī ta.abīr nahīñ

mere atrāf ye zanjīr-r-alā.eq kaisī

zindagī jurm sahī qābil-e-tāzīr nahīñ

kis tarah paa.eñ is afsurda-mizājī se najāt

hamdamo ham-suḳhano kyā koī tadbīr nahīñ