chaḌhte tūfān ko sāhil se guzarnā thā miyāñ
riit ke ghar ko bahar-hāl bikharnā thā miyāñ
kab talak paañv ko toḌe hue baiThā rahtā
rāh-e-dushvār se rah-rav ko guzarnā thā miyāñ
itne mānūs the sayyād se jaate na kahīñ
qaid meñ par na parindoñ ke katarnā thā miyāñ
jab na samjhe to phir ab chheḌ ke pachhtānā kyā
chashm-e-namnāk meñ ublā huā jharnā thā miyāñ
ishq ke gahre samundar meñ ga.e kyuuñ 'anvar'
uthle paanī meñ agar Duub ke marnā thā miyāñ