kaise unheñ bhulā.ūñ mohabbat jinhoñ ne kī
mujh ko to vo bhī yaad haiñ nafrat jinhoñ ne kī
duniyā meñ ehtirām ke qābil vo log haiñ
ai zillat-e-vafā tirī izzat jinhoñ ne kī
tazīn-e-kā.enāt kā baa.is vahī bane
duniyā se iḳhtilāf kī jur.at jinhoñ ne kī
āsūdgān-e-manzil-e-lailā udaas haiñ
achchhe rahe, na tai ye masāfat jinhoñ ne kī
ahl-e-havas to ḳhair havas meñ hue zalīl
vo bhī hue ḳharāb, mohabbat jinhoñ ne kī