do āñkhoñ se kam se kam ik manzar meñ

dekhūñ rañg-o-nūr baham ik manzar meñ

apnī khoj meñ sargardāñ be-samt hujūm

tanhā.ī detī hai janam ik manzar meñ

titlī ko ruḳhsār pe baiThā chhoḌ aa.e

hairat ko darkār the ham ik manzar meñ

lamha lamha bharte jaa.eñ ḳhauf kā rañg

gahrī shaam aur tez qadam ik manzar meñ

ghaat meñ baiThā koī dānish-var mujh ko

gar detā hai roz raqam ik manzar meñ

ab jo apnā saaya DhūñDhtā phirtā hai

jā nikle the bhuul ke ham ik manzar meñ