ye jis ne jaan dī hai naan degā
diyā hai jis ne sar sāmān degā
mizha se us kamāñ-abrū kī bachnā
vo nāvak hai kaleja chhān degā
mashaqqat se vo de yā be-mashaqqat
ba-har-sūrat ba-har-unvān degā
vo bosa de ke dil le kar ye bole
evaz ehsāñ kā kyā insān degā
milegā qadr-dān-e-ishq ham ko
ḳhudā ma.ashūq bā.īmān degā
suneñge tab butān-e-hind apnī
ijāzat jab unheñ shaitān degā
fasāna kohkan kā sun ke bole
jo āshiq hogā vo hī jaan degā
na thī ummīd tujh se qāsim baḳht
dil-e-pur-dard o pur-armān degā
rah-e-ulfat kā huuñ kār-āzmūda
kisī ko dil koī anjān degā
chalegā tiir jab apnī duā kā
kaleje dushmanoñ ke chhān degā
muqaddar se zyāda ek luqma
gadā kyā legā kyā sultān degā
lipaT jā.ūñgā un se roz-e-vaslat
agar mujh ko ḳhudā ausān degā
na phailā 'muntahī' dast-e-havas ko
vagarna ye tujhe nuqsān degā