baiTh jaatā thā maiñ thak kar apne tan kī chhāñv meñ

ek ghar hotā thā apne naam kā us gaañv meñ

qatre qatre ko tarastā hī rahā maiñ umr bhar

go safar kartā rahā maiñ umr bhar dariyāoñ meñ

mar ke jiitā thā kabhī maiñ jī ke martā thā kabhī

ḳhush-nasībī thī safar kartā thā do duniyāoñ meñ

dekhtī āñkhoñ se ham chup-chāp sunte hī rahe

guftugū jaarī thī rañg-e-gul pe nā-bīnāoñ meñ

shahr meñ rahte hue tanhā.ī kā ye haal thā

maiñ ghirā rahtā thā jaise be-karāñ sahrāoñ meñ

jis shajar ko kaaT kar us ne haTāyā raah se

rah chukā thā vo shajar us ke karam-farmāoñ meñ

ḳhvāb meñ 'ālam' ne auj-e-arsh tak parvāz kī

aur jaage to vahī chakkar thā apne paañv meñ