malāl-e-dil se ilāj-e-ġham-e-zamāna kiyā

ziyā-e-mehr se raushan charāġh-e-ḳhāna kiyā

sahar huī to vo aa.e laToñ ko chhaTkāte

zarā ḳhayāl-e-pareshāni-e-sabā na kiyā

hazār shukr ki ham maslahat-shanās na the

ki ham ne jis se kiyā ishq vālehāna kiyā

vo jis ke lutf meñ begānagī bhī shāmil thī

usī ne aaj guzar dil se mahramāna kiyā

vo bazm-e-harf ho yā mahfil-e-samā-e-ḳhayāl

jahāñ bhī vajd kiyā ham ne be-tarāna kiyā