haath se nāptā huuñ dard kī gahrā.ī ko
ye nayā khel milā hai mirī tanhā.ī ko
thā jo siine meñ charāġh-e-dil-pur-ḳhūñ na rahā
chāTiye baiTh ke ab sabr o shakebā.ī ko
dil-e-afsurda kisī tarah bahaltā hī nahīñ
kyā kareñ aap kī is hausla-afzā.ī ko
ḳhair badnām to pahle bhī bahut the lekin
tujh se milnā thā ki par lag ga.e rusvā.ī ko
nigah-e-nāz na milte hue ghabrā ham se
ham mohabbat nahīñ kahne ke shanāsā.ī ko
dil hai nairañgi-e-ayyām pe hairāñ ab tak
itnī sī baat bhī mālūm nahīñ bhaa.ī ko