mil hī aate haiñ use aisā bhī kyā ho jā.egā
bas yahī na dard kuchh dil kā savā ho jā.egā
vo mire dil kī pareshānī se afsurda ho kyuuñ
dil kā kyā hai kal ko phir achchhā bhalā ho jā.egā
ghar se, kuchh ḳhvāboñ se milne ke liye nikle the ham
kyā ḳhabar thī zindagī se sāmnā ho jā.egā
rone lagtā huuñ mohabbat meñ to kahtā hai koī
kyā tire ashkoñ se ye jañgal harā ho jā.egā
kaise aa saktī hai aisī dil-nashīñ duniyā ko maut
kaun kahtā hai ki ye sab kuchh fanā ho jā.egā