ishq meñ ye nādānī karnī paḌtī hai
us ke naam javānī karnī paḌtī hai
inheñ bachānā paḌtā hai ta.abīroñ se
ḳhvāboñ kī nigarānī karnī paḌtī hai
aag lagā.ī jā saktī hai paanī meñ
ik koshish lā-sānī karnī paḌtī hai
sunte sunte jab bachche so jaate haiñ
mujh ko ḳhatm kahānī karnī paḌtī hai
ḳhvāhishāt ko mumkin hai bas meñ karnā
un kī nā-farmānī karnī paḌtī hai
apne aap ko sachchā sābit karne meñ
aksar laġhv-bayānī karnī paḌtī hai
kabhī kabhī maiñ yuuñ bachcha ho jaatā huuñ
kabhī kabhī shaitānī karnī paḌtī hai