dast-e-sumūm dast-e-sabā kyuuñ nahīñ huā
dar mausam-e-bahār kā vā kyuuñ nahīñ huā
zālim the varā-e-hisāb-o-kitāb kyā
un par nuzūl-e-qahr-e-ḳhudā kyuuñ nahīñ huā
un ke saroñ pe kyuuñ nahīñ TūTīñ qayāmateñ
an ke gharoñ meñ hashr bapā kyuuñ nahīñ huā
gūñjī na kyuuñ falak se koī āyat-e-ġhazab
ye gumbad-e-sukūt sadā kyuuñ nahīñ huā
dil meñ haiñ kis umiid ke panje gaḌe hue
ye maas nāḳhunoñ se judā kyuuñ nahīñ huā