zehn kā safar tanhā dil kī rahguzar tanhā
aadmī huā yaaro aaj kis qadar tanhā
muqtadir sahāroñ kī har qadam pe hājat hai
kab maqām paatā hai apnā ye hunar tanhā
phir mujhe Darā.eñgī ḳhāmushī kī āvāzeñ
phir mujhe hai tai karnā raat kā safar tanhā
jis ke saa.e ne ham ko bārhā panāheñ diiñ
aaj bhī khaḌā hai vo raah meñ shajar tanhā
daur-e-be-niyāzī meñ kaun kis ko pūchhe hai
bhiiḌ meñ bhī paatā hai ḳhud ko har bashar tanhā