kis jhuTpuTe ke rañg ujāloñ meñ aa ga.e
TukḌe shafaq ke dhuup se gāloñ meñ aa ga.e
afsurdagī kī lai bhī tire qahqahoñ meñ thī
patjhaḌ ke sur bahār ke jhāloñ meñ aa ga.e
uḌ kar kahāñ kahāñ se parindoñ ke qāfile
nādīda pāniyoñ ke ḳhayāloñ meñ aa ga.e
husn-e-tamām the to koī dekhtā na thā
tum dard ban ke dekhne vāloñ meñ aa ga.e
kāñTe samajh ke ghaas pe chaltā rahā huuñ maiñ
qatre tamām os ke chhāloñ meñ aa ga.e
kuchh rat-jage the jin kī zarūrat nahīñ rahī
kuchh ḳhvāb the jo mere ḳhayāloñ meñ aa ga.e