vafā kyā kar nahīñ sakte haiñ vo lekin nahīñ karte
kahā kyā kar nahīñ sakte haiñ vo lekin nahīñ karte
masīhā.ī kā da.avā aur bīmāroñ se ye ġhaflat
davā kyā kar nahīñ sakte haiñ vo lekin nahīñ karte
raqīboñ par adū par ġhair par charḳh-e-sitamgar par
jafā kyā kar nahīñ sakte haiñ vo lekin nahīñ karte
kabhī dād-e-mohabbat de ke haq merī vafāoñ kā
adā kyā kar nahīñ sakte haiñ vo lekin nahīñ karte
zakāt-e-husn de kar apne kūche ke gadāoñ kā
bhalā kyā kar nahīñ sakte haiñ vo lekin nahīñ karte
dil-e-'muztar' ko qaid-e-dām-e-gesū-e-pareshāñ se
rihā kyā kar nahīñ sakte haiñ vo lekin nahīñ karte