ham umr ke saath haiñ safar meñ
baiThe hue jā rahe haiñ ghar meñ
ham luT ga.e terī rahguzar meñ
ye ek huī hai umr-bhar meñ
ab kaun rahā ki jis ko dekhūñ
ik tū thā so aa gayā nazar meñ
hasrat ko milā hai ḳhāna-e-dil
taqdīr khulī ġharīb ghar meñ
āñkheñ na churāo dil meñ rah kar
chorī na karo ḳhudā ke ghar meñ
ab vasl kī raat ho chukī ḳhatm
lo chhup raho dāman-e-sahar meñ
maiñ aap hī un se boltā huuñ
baiThā huuñ zabān-e-nāma-bar meñ
'muztar' karo dil hī dil meñ shikve
rah jā.egī baat ghar kī ghar meñ