sab sharīk-e-sadma-o-āzār kuchh yūñhī se haiñ
yaar kuchh yūñhī se haiñ ġham-ḳhvār kuchh yūñhī se haiñ
un ke sab afa.āl sab atvār kuchh yūñhī se haiñ
qaul kuchh yūñhī se haiñ iqrār kuchh yūñhī se haiñ
apne dīvāne se mil liije usī meñ ḳhair hai
aap abhī rusvā sar-e-bāzār kuchh yūñhī se haiñ
jis jagah dekho nasīhat ke liye maujūd haiñ
hazrat-e-nāseh ḳhudā.ī-ḳhvār kuchh yūñhī se haiñ
dast-e-vahshat ne garebāñ kā safāyā kar diyā
jeb ke parde meñ thoḌe taar kuchh yūñhī se haiñ
un ke aane kī ḳhabar sun kar uḌā dī hai ḳhabar
varna 'muztar' vāqa.ī bīmār kuchh yūñhī se haiñ