mā.il-e-sohbat-e-aġhyār to ham haiñ tum kaun
kyuuñ burā maan ga.e yaar to ham haiñ tum kaun
kyuuñ rihā.ī kī duā karte ho tum hazrat-e-dil
un kī zulfoñ meñ giraftār to ham haiñ tum kaun
zāhido hashr ke din tum ko ḳhudā kyuuñ baḳhshe
vājiburrahm gunahgār to ham haiñ tum kaun
un kī āñkhoñ se mire sog meñ aañsū jo gire
zulf bolī ki azā-dār to ham haiñ tum kaun
dil-e-'muztar' kī vafāoñ se tumheñ kyā matlab
us kī har chiiz ke muḳhtār to ham haiñ tum kaun