mere armāñ vo sudhāre yuuñ ke yūñhīñ rah ga.e
hausle saare ke saare yuuñ ke yūñhīñ rah ga.e
jo duā māñgī vo phir vāpas na aa.ī hijr meñ
haath ham apne pasāre yuuñ ke yūñhīñ rah ga.e
jaan lene kā to va.ada aaj puurā ho gayā
aur sab va.ade tumhāre yuuñ ke yūñhīñ rah ga.e
vaqt-e-zīnat sun ke vo merī pareshānī kā haal
apne gesū be-sañvāre yuuñ ke yūñhīñ rah ga.e
de ke dil un ko na dekhā aur ko 'muztar' kabhī
sab hasīñ joban ubhāre yuuñ ke yūñhīñ rah ga.e