saheñ kab tak jafā.eñ bevafā.ī dekhne vaale
kahāñ tak jaan par kheleñ judā.ī dekhne vaale
tire bīmār-e-ġham kī ab to nabzeñ bhī nahīñ miltīñ
kaf-e-afsos malte haiñ kalā.ī dekhne vaale
ḳhudā se kyuuñ na māñgeñ kyuuñ kareñ minnat amīroñ kī
ye kyā deñge kisī ko āna-pā.ī dekhne vaale
butoñ kī chaah bantī hai sabab ishq-e-ilāhī kā
ḳhudā ko dekh lete haiñ ḳhudā.ī dekhne vaale
mahīnoñ bhā.ī-bandoñ ne mirā mātam kiyā 'muztar'
mahīnoñ ro.e ḳhālī chārpā.ī dekhne vaale