ḳhuun ban kar munāsib nahīñ dil bahe
dil nahīñ māntā kaun dil se kahe
terī duniyā meñ aa.e bahut din rahe
sukh ye paayā ki ham ne bahut dukh sahe
bulbuleñ gul ke aañsū nahīñ chāTtīñ
un ko apne hī marġhūb haiñ chahchahe
ālam-e-nazā meñ sun rahā huuñ meñ kyā
ye azīzoñ kī chīḳheñ haiñ yā qahqahe
is na.e husn kī bhī adāoñ pe ham
mar miTeñge ba-shart-e-ki zinda rahe
tum 'hafīz' ab ghisaTne kī manzil meñ ho
daur-e-ayyām pahiya hai ġham haiñ pahe