tum ne jo manfa.at se ḳhasāra badal diyā

ham ne mufāhamat kā irāda badal diyā

ai bevafā hayāt tirī gardishoñ kī ḳhair

tū ne bhī kaisā vaqt sunahrā badal diyā

koī to vārdāt huī hai jī us ke saath

kuchh to hai jis ne ye dil-e-sāda badal diyā

go jītnā hamārī baqā kā savāl thā

lekin bisāt-e-vaqt ne mohara badal diyā

pahle to ziist karne kī himmat thī āhanī

kam-mā.egī thī jis ne irāda badal diyā

mafhūm jaan lene se qāsir nahīñ haiñ ham

to kyā huā ki aap ne fiqra badal diyā

ye raushnī kā aadī rahā hai tamām umr

tārīkiyoñ ne shahr kā naqsha badal diyā

apnī tarah ke ek hī haiñ aap bhī janāb

jab ham badal ga.e to irāda badal diyā

ye ishq hī kā vasf rahā hai ki 'sā.ima'

dil pe chaḌhā thā rañg jo gahrā badal diyā