ā.ankhoñ se maiñ ne chakh liyā mausam ke zahr ko
lekin vajūd sah na sakā us ke qahr ko
pheñkā thā kis ne sañg-e-havas raat ḳhvāb meñ
phir DhūñDhtī hai niiñd usī pichhle pahr ko
miTTī ke sab makān zamīñ-doz ho ga.e
naqshe meñ ab talāsh karo apne shahr ko
dariyā-e-shab kā TuuT gayā hai sukūt aaj
muddat ke ba.ad dekh ke kirnoñ kī nahr ko
saa.e ke saath vaqt ke dauḌā vo der tak
palkoñ meñ phir chhupā liyā lamhoñ ke qahr ko
paimāna-e-gulāb ko hoñToñ se chuum kar
muTThī meñ qaid kar liyā ḳhushbū kī lahr ko