nisf se dekh zarā kam na ziyāda aadhā
baañT lete haiñ mohabbat tujhe aadhā aadhā
mehrbāñ ishq mujhe kaaT diyā jā.egā
hone vaalā hai mirā dast-e-kushāda aadhā
chauk meñ dekhne vaale the tamāsha us kā
jis ko ġhurbat meñ mayassar thā labāda aadhā
mere behis maiñ tujhe milne nahīñ ā.ūñgī
aaj taqsīm huā merā irāda aadhā
kūza-gar mujh ko bikharnā hai bikhar jaane de
merī tajsīm meñ shāmil hai burāda aadhā
terī duniyā bhī mirī tarah ujaḌ jā.egī
rah gayā mujh meñ agar sabr kā mādda aadhā
baaqī aadhī to kisī aur kī muTThī meñ dabī
pusht par maiñ ne tujhe ziist hai laadā aadhā