uḌte lamhoñ ke bhañvar meñ koī phañstā hī nahīñ

is samundar meñ koī tairne vaalā hī nahīñ

sālhā-sāl se vīrān haiñ dil kī galiyāñ

ek muddat se koī is taraf aayā hī nahīñ

aañkh ke ġhaar meñ haiñ saikḌoñ saḌtī lāsheñ

jhāñk kar un meñ kisī ne kabhī dekhā hī nahīñ

duur tak phail ga.ī TūTte lamhoñ kī ḳhalīj

vaqt kā saaya mire sar se utartā hī nahīñ

silsila rone kā sadiyoñ se chalā aatā hai

koī aañsū mirī palkoñ pe Thahartā hī nahīñ

jalte ākāsh kī Dhalvān pe sūraj kā vajūd

ik pighaltā huā laavā hai ki bujhtā hī nahīñ