tohmat-e-chand apne zimme dhar chale
jis liye aa.e the so ham kar chale
zindagī hai yā koī tūfān hai
ham to is jiine ke hāthoñ mar chale
kyā hameñ kaam in guloñ se ai sabā
ek dam aa.e idhar ūdhar chale
dosto dekhā tamāshā yaañ kā sab
tum raho ḳhush ham to apne ghar chale
aah bas mat jī jalā tab jāniye
jab koī afsūñ tirā us par chale
ek maiñ dil-resh huuñ vaisā hī dost
zaḳhm kitnoñ ke sunā hai bhar chale
sham.a ke mānind ham is bazm meñ
chashm-tar aa.e the dāman-e-tar chale
DhūñDhte haiñ aap se us ko pare
shaiḳh sāhab chhoḌ ghar bāhar chale
ham na jaane paa.e bāhar aap se
vo hī aaḌe aa gayā jīdhar chale
ham jahāñ meñ aa.e the tanhā vale
saath apne ab use le kar chale
juuñ sharar ai hastī-e-be-būd yaañ
baare ham bhī apnī baarī bhar chale
sāqiyā yaañ lag rahā hai chal-chalāv
jab talak bas chal sake sāġhar chale
'dard' kuchh ma.alūm hai ye log sab
kis taraf se aa.e the kīdhar chale