chehra lāla-rañg huā hai mausam-e-ranj-o-malāl ke baad
ham ne jiine kā gur jaanā zahr ke istimāl ke baad
kis ko ḳhabar thī muḳhtārī meñ hoñge vo itne majbūr
ham apne se sharminda haiñ un se arz-e-hāl ke baad
apne sivā apne rishte meñ aur bhī kuchh duniyā.eñ thiiñ
ham ne apnā haal likkhā lekin dīgar ahvāl ke baad
āñkheñ yuuñ hī bhiig ga.iiñ kyā dekh rahe ho āñkhoñ meñ
baiTho sāhab kaho suno kuchh mile ho kitne saal ke baad
toḌe kitne ā.īne aur chhān liye kitne āfāq
koī na manzar aañkh meñ Thahrā us ke aks-e-jamāl ke baad
naqsh-garī kā buutā ho to dhuup chhāñv meñ rañg bahut
chehra ḳhud ban jā.egā teḌhī-meḌhī ashkāl ke baad