koī pahle to koī baad meñ ayyār huā

apnī ḳhvāhish pe jo vābasta-e-darbār huā

ik tahī-jeb kī zaarī koī suntā kaise

raa.ij aise hī nahīñ sikka-e-dīnār huā

baat sultān se kyā taḳhliye meñ us kī huī

maslahat-kesh batāne pe na tayyār huā

muḳhbirī merī huī chashm-e-zadan meñ kaisī

qasr-e-dil hī meñ saarā thā ki mismār huā

raah meñ aa.e hue shāna-e-kohsār ke saath

abr Takrā ke jo palTā to guhar-bār havā

apnī haq-goī ke bā-vasf nigūñ-sārī par

dosh par apne mirā sar hī mujhe baar huā

haañ ye mumkin hai magar itnā zarūrī bhī nahīñ

jo koī pyaar meñ haarā vahī fankār huā

ik nazar us ne uchaTtī huī kī thī 'yāsir'

aur phir shahr meñ rahnā mujhe dushvār huā