ziist kī dhuup se yuuñ bach ke nikaltā kyuuñ hai
tū jo sūraj hai to phir saa.e meñ chaltā kyuuñ hai
tū jo patthar hai to phir palkoñ pe aañsū kaise
tū samundar hai to phir aag meñ jaltā kyuuñ hai
mere chehre meñ jo shā.ista-nazar aatā hai
merī shiryānoñ meñ vo shaḳhs ubaltā kyuuñ hai
kal tumhīñ ne use ye pyāla diyā thā yaaro
mo'tariz kyuuñ ho ki vo zahar ugaltā kyuuñ hai
merī sāñsoñ meñ sisakne kī sadā aatī hai
ek marghaT sā mire siine meñ jaltā kyuuñ hai
jaane kin zarroñ se us ḳhuuñ kī shanāsā.ī hai
paañv us moḌ pe hī aa ke phisaltā kyuuñ hai
mahfil-e-laġhv se tahzīb ne kyā lenā hai
aise shorīda-saroñ meñ tū sambhaltā kyuuñ hai