apnī manzil kā rāsta bhejo
jaan ham ko vahāñ bulā bhejo
kyā hamārā nahīñ rahā sāvan
zulf yaañ bhī koī ghaTā bhejo
na.ī kaliyāñ jo ab khilī haiñ vahāñ
un kī ḳhushbū ko ik zarā bhejo
ham na jiite haiñ aur na marte haiñ
dard bhejo na tum davā bhejo
dhuul uḌtī hai jo us āñgan meñ
us ko bhejo sabā sabā bhejo
ai faqīro galī ke us gul kī
tum hameñ apnī ḳhāk-e-pā bhejo
shafaq-e-shām-e-hijr ke hāthoñ
apnī utrī huī qabā bhejo
kuchh to rishta hai tum se kam-baḳhtoñ
kuchh nahīñ koī bad-duā bhejo