bazm se jab nigār uThtā hai
mere dil se ġhubār uThtā hai
maiñ jo baiThā huuñ to vo ḳhush-qāmat
dekh lo baar baar uThtā hai
terī sūrat ko dekh kar mirī jaañ
ḳhud-baḳhud dil meñ pyaar uThtā hai
us kī gul-gasht se ravish-ba-ravish
rañg hī rañg yaar uThtā hai
tere jaate hī is ḳharābe se
shor-e-girya hazār uThtā hai
kaun hai jis ko jaañ aziiz nahīñ
le tirā jāñ-nisār uThtā hai
saf-ba-saf aa khaḌe hue haiñ ġhazāl
dasht se ḳhāksār uThtā hai
hai ye tesha ki ek sho.ala sā
bar-sar-e-kohsār uThtā hai
karb-e-tanhā.ī hai vo shai ki ḳhudā
aadmī ko pukār uThtā hai
tū ne phir kasb-e-zar kā zikr kiyā
kahīñ ham se ye baar uThtā hai
lo vo majbūr shahr-e-sahrā se
aaj dīvāna-vār uThtā hai
apne yaañ to zamāne vāloñ kā
roz hī e.atibār uThtā hai
'jaun' uThtā hai yuuñ kaho ya.anī
'mīr'-o-'ġhālib' kā yaar uThtā hai