juz gumāñ aur thā hī kyā merā
faqat ik merā naam thā merā
nik.hat-e-pairahan se us gul kī
silsila be-sabā rahā merā
mujh ko ḳhvāhish hī DhūñDne kī na thī
mujh meñ khoyā rahā ḳhudā merā
thuuk de ḳhuun jaan le vo agar
ālam-e-tark-e-mudda.ā merā
jab tujhe merī chaah thī jānāñ
bas vahī vaqt thā kaḌā merā
koī mujh tak pahuñch nahīñ paatā
itnā āsān hai patā merā
aa chukā pesh vo muravvat se
ab chalūñ kaam ho chukā merā
aaj maiñ ḳhud se ho gayā māyūs
aaj ik yaar mar gayā merā