jo hazrat-e-shaiḳh farmā.eñ mohabbat
sabhī ko ḳhuub samjhā.eñ mohabbat
zarūrī to nahīñ ham zindagī meñ
mohabbat kā samar paa.eñ mohabbat
mujhe gherā huā hai nafratoñ ne
na daa.eñ hai na hai baa.eñ mohabbat
hamārā mashvara hai har kisī ko
ki nafrat bech kar laa.eñ mohabbat
mujhe hāthoñ ko un ke chūmnā hai
vo ḳhush haiñ ki jo jo paa.eñ mohabbat
nahīñ gar lāzmī to iḳhtiyārī
nayā mazmūn rakhvā.eñ mohabbat
vo jis ke gaal pe chhoTā sā til hai
usī laḌkī ko samjhā.eñ mohabbat
zamīn-o-āsmāñ ko chhān maarā
kahāñ se DhūñD kar laa.eñ mohabbat
chalo ham jā ke dillī meñ raheñ ab
ugā.eñ pyaar aur khā.eñ mohabbat