maiñ kah rahā huuñ sar-e-ām barmalā baabā
gumān hai bhare mele meñ kho gayā baabā
kaḌī hai dhuup tamāzat se paañv jalte haiñ
jo sā.ebān saroñ par thā kyā huā baabā
zarā sī baat pe āñkheñ barasne lagtī haiñ
kahāñ se DhūñD ke lā.ūñgā hausla baabā
tumhāre ba.ad to lamhe nahīñ guzarte haiñ
abhī to umr kā baaqī hai marhala baabā
bas ek umr bachchī hai tumhārī yaad liye
ab apne paas bachā bhī hai aur kyā baabā
rukī jo saañs tumhārī badal ga.ī duniyā
kahāñ vo rabt kisī se jo pahle thā baabā
maiñ tiin pahar se baiThā huā huuñ qabr ke paas
ab apne karb sameTo ki maiñ chalā baabā
agar satāyā zamāne ne zahr khā lūñgā
tumhārā beTā hai 'ashraf' bhī sar-phirā baabā