dohrā.ūñ kyā fasāna-e-ḳhvāb-o-ḳhayāl ko

guzre ka.ī firāq kisī ke visāl ko

rishta ba-juz-gumān na thā zindagī se kuchh

maiñ ne faqat qayās kiyā maah o saal ko

shāyad vo sañg-dil ho kabhī mā.il-e-karam

sūrat na de yaqīn kī is ehtimāl ko

tarġhīb kā hai vus.at-e-imkāñ pe inhisār

ram-ḳhurdagī sikhātā hai sahrā ġhazāl ko

'sahbā' sadā bahār hai ye gulsitān-e-fan

mumkin nahīñ zavāl suḳhan ke kamāl ko