maiñ dastaras se tumhārī nikal bhī saktā huuñ

ye soch lo ki maiñ rasta badal bhī saktā huuñ

tumhāre baad ye jaanā ki maiñ jo patthar thā

tumhāre baad kisī dam pighal bhī saktā huuñ

qalam hai haath meñ kirdār bhī mire bas meñ

agar maiñ chāhūñ kahānī badal bhī saktā huuñ

mirī sirisht meñ vaise to ḳhushk dariyā hai

agar pukār le sahrā ubal bhī saktā huuñ

use kaho ki gurezāñ na yuuñ rahe mujh se

maiñ ehtiyāt kī bārish meñ jal bhī saktā huuñ