jis taraf chāhūñ pahuñch jā.ūñ masāfat kaisī
maiñ to āvāz huuñ āvāz kī hijrat kaisī
sunñe vāloñ kī samā.at ga.ī goyā.ī bhī
qissa-go tū ne sunā.ī thī hikāyat kaisī
ham junūñ vaale haiñ ham se kabhī pūchho pyāre
dasht kahte haiñ kise dasht kī vahshat kaisī
aap ke ḳhauf se kuchh haath baḌhe haiñ lekin
dast-e-majbūr kī sahmī huī bai.at kaisī
phir na.e saal kī sarhad pe khaḌe haiñ ham log
raakh ho jā.egā ye saal bhī hairat kaisī
aur kuchh zaḳhm mire dil ke havāle mirī jaañ
ye mohabbat hai mohabbat meñ shikāyat kaisī
maiñ kisī aañkh se chhalkā huā aañsū huuñ 'nabīl'
merī tā.īd hī kyā merī baġhāvat kaisī