ḳhaak chehre pe mal rahā huuñ maiñ

āsmāñ se nikal rahā huuñ maiñ

chupke chupke vo paḌh rahā hai mujhe

dhīre dhīre badal rahā huuñ maiñ

maiñ ne sūraj se dostī kī hai

shaam hote hī Dhal rahā huuñ maiñ

ek ātish-kada hai ye duniyā

jis meñ sadiyoñ se jal rahā huuñ maiñ

rāstoñ ne qabā.eñ sī lī haiñ

ab safar ko machal rahā huuñ maiñ

ab mirī justujū kare sahrā

ab samundar pe chal rahā huuñ maiñ

ḳhvāb āñkhoñ meñ chubh rahe the 'nabīl'

so ye āñkheñ badal rahā huuñ maiñ