havā-e-sabz kā jhoñkā koī ġhuncha khilātā hai

ḳhizāoñ kā tilism-e-zard āḳhir TuuT jaatā hai

guloñ ke maḳhmaleñ āñchal namī se bhiig jaate haiñ

kisī kī yaad meñ shab bhar falak aañsū bahātā hai

kisī be-mehr saa.at meñ tumhārā muskurā denā

shab-e-tārīk meñ jaise sitārā TimTimātā hai

ta.āqub titliyoñ kā par uThā laanā parindoñ ke

kisī jugnū ko āñchal meñ chhupānā yaad aatā hai

dhuāñ uThtā hai yādoñ kā sulagte dil ke pahlū se

kisī kī surmagīñ āñkhoñ kā kājal phail jaatā hai