bahut thā ḳhauf jis kā phir vahī qissā nikal aayā
mire dukh se kisī āvāz kā rishtā nikal aayā
vo sar se paañv tak jaise sulagtī shaam kā manzar
ye kis jaadū kī bastī meñ dil-e-tanhā nikal aayā
jin āñkhoñ kī udāsī meñ bayābāñ saañs lete haiñ
unhīñ kī yaad meñ naġhmoñ kā ye dariyā nikal aayā
sulagte dil ke āñgan meñ huī ḳhvāboñ kī phir bārish
kahīñ koñpal mahak uTThī kahīñ pattā nikal aayā
pighal uThtā hai ik ik lafz jin hoñToñ kī hiddat se
maiñ un kī aañch pī kar aur bhī sachchā nikal aayā
gumāñ thā zindagī be-samt o be-manzil bayābāñ hai
magar ik naam par phūloñ-bharā rastā nikal aayā