gaañv meñ ab gaañv jaisī baat bhī baaqī nahīñ
yaanī guzre vaqt kī sauġhāt bhī baaqī nahīñ
titliyoñ se halke phulke din na jaane kyā hue
jugnuoñ sī TimTimātī raat bhī baaqī nahīñ
muskurāhaT jeb meñ rakkhī thī kaise kho ga.ī
haif ab ashkoñ kī vo barsāt bhī baaqī nahīñ
but-parastī sheva-e-dil ho to koī kyā kare
ab to kaabe meñ hubal aur laat bhī baaqī nahīñ
chhat pe jaanā chāñd ko taknā kisī kī yaad meñ
vaqt ke dāman meñ vo auqāt bhī baaqī nahīñ