kyā sahl samjhe ho kahīñ dhabbā chhuTā na ho

zālim ye merā ḳhuun hai rañg-e-hinā na ho

yārab mujhe hai dāġh-e-tamannā bahut aziiz

pahlū se dil judā ho magar ye judā na ho

rāheñ nikāltā hai yahī soz-o-sāz kī

pahlū meñ dil na ho to koī hausla na ho

tum aur vafā karo ye na mānūñgā maiñ kabhī

us ko fareb do jo tumheñ jāntā na ho

kyā kyā 'sharar' zalīl hue aabrū ga.ī

aisā bhī āshiqī kā kisī ko mazā na ho