badlegī kā.enāt mirī baat maan lo
mujh se milāo haat mirī baat maan lo
ham se qadam milā ke chaloge to dekhnā
sar hoñge shash-jahāt mirī baat maan lo
bigḌī huī jo baat baḌī muddatoñ se hai
ban jā.egī vo baat mirī baat maan lo
hai zindagī baġhair tumhāre ik iztirāb
de do ise sabāt mirī baat maan lo
kis ne kahā hai tum se ki tā-umr saath do
hai chaar din kī baat mirī baat maan lo
piinā paḌe kahīñ na tumheñ bhī mirī tarah
talḳhāba-e-hayāt mirī baat maan lo
maiñ jāntā huuñ merī tarah chāhtī ho tum
tanhā.ī se najāt mirī baat maan lo