huī hai ham meñ aur is gul meñ kyā kyā maar phūloñ kī

gale tak uTh ga.ī gulzār meñ dīvār phūloñ kī

bahār aa.ī hai gulshan ne qabā-e-sabz badlī hai

javānān-e-chaman ke sar pe hai dastār phūloñ kī

chaman meñ āj-kal us zor se paanī barastā hai

huī hai bulbuloñ par har taraf bauchhār phūloñ kī

bike haiñ kauḌiyoñ ke mol da.avā kar ke us gul se

ga.ī hai aabrū kyā kyā sar-e-bāzār phūloñ kī

rasā.ī 'qadr' kī kyuuñ kar na ho is bazm-e-rañgīñ meñ

chaman meñ rakhte haiñ sohbat hamesha ḳhaar phūloñ kī