falak ke rañg zamīñ par utārtā huā maiñ
tamām ḳhalq ko hairat se mārtā huā maiñ
do chaar saañs meñ jiitā huuñ ek arse tak
zarā se vaqt meñ sadiyāñ guzārtā huā maiñ
jo mere sāmne hai aur dil-o-dimāġh meñ bhī
chahār-samt usī ko pukārtā huā maiñ
mire nuqūsh pe kārī-garī rukī huī hai
shikasta chaak se ḳhud ko utārtā huā maiñ
tumhārī jiit meñ pinhāñ hai merī jiit kahīñ
tumhāre sāmne har baar hārtā huā maiñ