koī an-dekhī fazā tasvīr karnā chāhiye

ḳhvāb kī buniyād par tāmīr karnā chāhiye

maiñ bhaTaktā phir rahā huuñ vāhimoñ ke darmiyāñ

gard lipTī ruuh kī tathīr karnā chāhiye

jin dinoñ dīvāngī Thahrī huī ho zaat meñ

ek duniyā un dinoñ tasḳhīr karnā chāhiye

jis sadā meñ sau tarah ke rañg jhilmil karte hoñ

vo sadā har haal meñ tasvīr karnā chāhiye

jald-bāzī de ga.ī hai rat-jagoñ ke silsile

faisle meñ thoḌī sī tāḳhīr karnā chāhiye

ab bagūle mujh meñ haiñ aur maiñ bagūloñ meñ 'ḳhayāl'

dasht meñ dīvāngī zanjīr karnā chāhiye